Бидејќи секој човек има препознатлив когнитивен стил, потребен е и индивидуализиран пристап кон работата. Токму персонализацијата на работните стратегии овозможува да го подобрите својот учинок. Карсон Тејт, експерт за продуктивност на работното место, издвојува неколку стилови на продуктивност – а препознавањето на вашиот стил може значително да ви го олесни работењето.
Приоритизатор
Овие личности претпочитаат логично, аналитичко, фактографско, критичко и реалистично размислување. Тие ефикасно го користат времето фокусирајќи се на задачата со најголема вредност. Брзо и прецизно завршуваат голем обем работа и најдобро функционираат при обработка на податоци и решавање сложени проблеми каде што можат да го применат својот „ласерски“ фокус за да ги постигнат целите.
Планер
Планерите размислуваат организирано, секвенцијално и детално. Тие однапред го распоредуваат времето потребно за извршување на проектите, ги организираат задачите, подготвуваат точни и детални планови и често завршуваат пред рокот. Планерот води прецизни листи и понекогаш дури ќе стави веќе завршена задача на листата – само за да може да ја пречкрта.
Аранжер
Аранжерите претпочитаат експресивно и емоционално размислување. Тие поттикнуваат тимска работа со цел да го максимизираат резултатот и донесуваат одлуки интуитивно, во реално време, како што се одвиваат настаните. Аранжерот мајсторски гради односи, го олеснува тимското функционирање и ефективно ги пренесува идеите низ целата организација. Одлични се во соработка со луѓе, следење на вклучените страни и навремена комуникација.
Визуелизатор
Визуелизаторите размислуваат холистички, интуитивно и интегрирачки. Тие ја гледаат „големата слика“ и не сакаат да губат време на ситни детали. Можат да бидат двигатели на промени, да создаваат решенија за проблеми, да иницираат иновации и да обезбедуваат разновидност во размислувањето и реализацијата.
Визуелизаторот генерира креативни и иновативни идеи, размислува стратешки, управува со повеќе концепти истовремено и ефикасно ги извршува сопствените задачи.
